PSG被金玟哉顶爆濒出局　安历基获免炒金牌

周三(27日)凌晨欧联大战，拜仁慕尼黑主场凭南韩中坚金玟哉顶入全场唯一入球，1比0击败法甲劲旅巴黎圣日耳门(PSG)。PSG输波后继续沉沦淘汰区，不过班主艾卡理化就向教练安历基颁“免炒金牌”，讲明就算欧联出局都唔会换帅。

今场大战战况唔算激烈，唯一入波出现喺38分钟，拜仁角球攻势令门前出现混乱，并由金玟哉近门顶入。PSG下半场力图反扑，但奥士文尼迪比利喺57分钟两黄一红被逐，PSG最终返魂乏术。PSG今届5战只得4分排喺淘汰区，最后3轮欧联分别对萨尔斯堡(客)、曼城(主)同史特加(客)，出线形势唔乐观。

安历基赛后表示：“上半场我哋入唔到局，适应唔到拜仁嘅紧逼，下半场本来好好多，但迪比利嘅红牌令唯一机会都失去，不过球员好有决心，要为呢场输波负责嘅人系我。”不过，PSG班主艾卡理化赛前先派定心丸，讲明欧联出局都唔会炒安历基：“无论欧联系咩成绩，安历基都会留低，球队依家重建紧，需要时间，我为呢支球队感到光荣。”