羅拔仔解鎖歐聯100球　巴塞3蛋贈比斯特

講到歐聯最佳前鋒，C朗拿度同美斯無疑係兩大不朽傳奇，不過波蘭前鋒羅拔利雲度夫斯基亦不遑多讓，佢周三(27日)凌晨歐聯梅開二度，帶領巴塞隆拿主場3比0大勝比斯特，呢位36歲神鋒亦解鎖「歐聯100球」里程碑，同兩大球並肩。

巴塞今場10分鐘搵到缺口，「羅拔仔」博到12碼後親自射入，呢球係佢生涯第100個歐聯入波；巴塞66分鐘由丹尼爾奧莫射成2比0，補時階段羅拔利雲度夫斯基再入多粒，助巴塞大勝3比0，今屆歐聯5戰4勝，晉級形勢理想。

「羅拔仔」喺歐聯累積101球，成為C朗拿度(141球)同美斯(129球)後，史上第3個達到呢個里程碑球員，而且佢只係用咗125場比賽就達成，入球率(0.81)比兩大球王更加優勝！「羅拔仔」賽後表示：「我好開心，幾年前我冇諗過可以喺歐聯入100球，但我哋唔可以放慢步伐，喺歇冬前要盡力贏晒每場比賽。」