教壞細路！哥迪奧拿為「自殘論」道歉

曼城近期成績沉淪，上場歐聯領先3球下都被追和，連續6場賽事不勝，領隊哥迪奧拿都睇到「搲爆頭」，不過佢賽後講笑話想「自殘」，就被網民炮轟教壞細路，搞到哥迪奧拿要發聲明道歉。

哥迪奧拿喺歐聯賽後，被影到頭上有多條傷痕，鼻哥亦抓損流血，佢當時開玩笑講咗句「我想自殘」，但就被批評輕視有情緒問題而有自殘傾向嘅人，有教壞細路之嫌。

見慣風浪嘅哥帥自知理虧，立即發表道歉聲明：「我畀記者呢條意想不到嘅問題難到，我當時解釋受傷係由指甲意外整到，完全無意輕視自殘呢個非常嚴重嘅問題，我知道每日都有好多人受到心理問題困擾，我亦要借呢個機會去呼籲，受到情緒問題困擾嘅人可以去搵專業機構求助。」