阿仙奴渔翁撒网搵总监　3大名将抢位

阿仙奴上月宣布总监伊度离职后，据报近期渔翁撒网式搵人接任，至今已联络过唔少候选人，而“兵工厂”近年锺情拥有球会DNA嘅人帮手，消息指总监一职亦有3位前球员在列，包括路斯基、梅迪萨卡同基拔图施华。

伊度近年同领队阿迪达合作无间，系阿仙奴成功重建嘅重要原因，所以新总监亦需要同阿迪达“倾得埋”，阿迪达昔日队友路斯基被视为热门之一，佢挂靴后喺布拉格斯巴达担任总监，表现备受好评。另一候选人系德国名将梅迪萨卡，事实上佢过去6年都喺阿仙奴担任青训主管，有机会被内部提升。至于近日有传，前巴西中场基拔图施华亦系候选之一，球员时代同伊度系好拍档嘅基拔图施华，曾经做过彭拿典奈高斯总监，近年亦曾担任阿仙奴宣传大使，会系总监一职嘅冷门之选。

报道指阿仙奴对新总监亦有定案，明年离开皇家苏斯达嘅奥拉比、巴黎圣日耳门嘅甘波斯、利华古逊嘅路菲斯、摩纳哥嘅施古路等等，通通都被指曾经同阿仙奴接触。阿迪达日前透露：“我可以讲嘅系，我会积极参与搵新总监嘅过程，总监一定要搵合适人选，即系可以令大家一齐进步，带领球队去到新层次嘅人。”