曉姆斯補時入波贖罪　羅馬2比2逼和熱刺

周五(29日)凌晨歐霸盃，熱刺主場同羅馬激戰踢成2比2平手。羅馬今場兩度落後，靠德國老將曉姆斯補時入波，彌補早段輸12碼嘅過錯，為羅馬搶番1分，新教練雲尼亞里大讚曉姆斯係球隊嘅典範。

兩隊都係攻強守弱，今場出現大量埋門鏡頭，3分鐘曉姆斯禁區內踢跌柏比沙亞輸12碼，孫興民操刀為熱刺領先。羅馬20分鐘由尼迪卡追平，但班倫莊臣入波再為熱刺半場領先2比1。

下半場羅馬連食兩次「詐胡」，安祖利奴又射中楣；熱刺亦有柏度樸路嘅罰球同蘇蘭基頭槌被門楣所阻。終於去到補時1分鐘，曉姆斯門前接應安祖利奴傳中撞入，「將功贖罪」逼和2比2完場。

羅馬教練雲尼亞里賽後表示：「輸嗰球12碼只係冇運，但曉姆斯好努力同好有決心，示範畀全隊睇點樣冷靜作戰，佢值得有呢個入波，因為佢全場好似獅子一樣奮力戰鬥。」