續約阿奴打定輸數　利物浦有意利華右閘

利物浦3大主力續約談判中，最難成事係阿歷山大阿諾特，分析指「阿奴」獲皇馬垂青，幾乎肯定離隊，而「紅軍」亦打定輸數，已開始物色右閘繼任者，睇中利華古遜荷蘭翼衞謝利美費林邦。

23歲嘅費林邦係新晉荷蘭國腳，有份出席今夏歐國盃，佢喺曼城青訓出身，踢過些路迪，2021年效力利華古遜至今，身價估計5,000萬歐元，其合約中有4,000萬歐元解約條款(約3.3億港元)，利物浦可以直接將佢買斷。

費林邦在坦哈格仍執教曼聯時期亦曾經成為「紅魔」目標，曼聯今夏簽入馬沙拉奧之後，雙方先減少接觸，皇馬亦曾對佢有興趣，但「銀河艦隊」好大機會簽入阿諾特，斟介費林邦亦冇咁積極。

按照事情發展，明年夏天「阿奴」轉投皇馬，利物浦就會簽入費林邦。