VAR推翻入波　修咸頓3分變1分護級形勢危

周六(30日)凌晨英超，白禮頓主場同修咸頓打和1比1，包尾嘅修咸頓曾於下半場攻入反超前1球，但球證睇完VAR後，認為入波越位無效，引起爭議。修咸頓3分變1分，護級形勢愈來愈危。

開波初段，白禮頓佔上風，包括三笘薰單刀起腳，但唔中目標，佐真尼奧魯達勁射中柱彈出。白禮頓攻勢一浪接一浪，29分鐘由三笘薰飛頂入波打開紀錄。修咸頓落後之下，搶番唔少攻勢，包括甘馬倫阿奇近門射高。

換邊後冇耐，阿當岩士唐起腳省中對手彈出，費恩唐尼斯補射入網，為修咸頓扳平1比1。戰至67分鐘出現爭議性一幕，甘馬倫阿奇接應傳中射入，球證睇完VAR後，認為身處越位位置嘅另1位修咸頓球員阿當岩士唐有攻門意圖，判入波越位無效。

賽後普遍輿論認為屬於錯判，受害者修咸頓近3場英超僅1和2負，落後尾4狼隊4分，兼踢多1場，加上陷入地獄賽程，未來3場聯賽對手包括車路士、阿士東維拉、熱刺，想翻身非常困難。