哥帥變「坦哈格2.0」　面臨創17年恥辱紀錄

曼城近期連番失利，領隊哥迪奧拿創下教波生涯多項最差紀錄，如果「藍月亮」下周一(12月2日)凌晨英超作客輸畀利物浦，就會遭遇近17年首次聯賽4連敗，令哥帥再增添一項恥辱紀錄。

哥迪奧拿執執曼城8年以來，近期陷入最黑暗時期，包括首次遭遇英超3連敗，各項賽事連續6場失2球或以上，上場歐聯被飛燕諾逼和3比3，成為歐聯史上首支75分鐘領先3球，卻未能贏波嘅球隊，亦係哥帥教波生涯首次領先3球，但贏唔到波，因而被網民拎來同前曼聯主帥坦哈格相提並論，因為呢位荷蘭名帥執教紅魔鬼期間，刷新球隊多項最差數據。

出戰利物浦前夕，哥迪奧拿唔認命，深信曼城可以大翻身：「今季仲有好多場比賽可以踢，當跌倒時，最重要識得起身，我哋必須重新振作。」不過，今場英超遇上榜首利物浦，普遍輿論睇死曼城又會再輸1場，翻查紀錄，曼城對上一次英超4連敗已經係2007年1月至3月，哥帥面臨創球隊近17年恥辱紀錄。