高級銀牌　復仇成功！艾華頓：終於贏番次

「高級組銀牌」周六（30日）爆發第一場4強大戰，最終理文以2比1擊敗傑志，繼2019至20球季再次殺入決賽，射入奠勝球的艾華頓賽後表示心情痛快，認為新主帥賀蘭特為球隊注入新活力，期望乘勝追擊，衝擊「高級組銀牌」冠軍。

臨完半場前一度遭「藍鳥」逼和，最終艾華頓成功把握罰球機會，為理文於「高級組銀牌」擊敗宿敵，艾華頓直言感到痛快：「上兩季都喺準決賽輸咗畀傑志，今季終於贏番佢哋一次，向外界證明我哋嘅實力，我真係覺得好開心，希望可以攞走埋今季銀牌獎盃。」作為易帥後的首勝，艾華頓認為新敎練賀蘭特為球隊帶來更多活力及幫助：「教練排咗個新陣式，呢啲部署上嘅變化幫到球隊好多，今場個個都踢得好有火，我相信呢場波只係一個開始，嚟緊會愈踢愈好，用表現話畀大家知我哋係一支強隊。」

對於周三（4日）將會上演理文於「亞冠盃2」的最後一場分組賽，艾華頓期望於主場踢出更好的發揮：「今場『大戰』畀到信心我哋應付淡濱尼流浪，星期四係最後一場主場比賽，我哋絕對會畀球迷睇到理文嘅水準，搏盡去踢。」