曼城急斟洛迪替身　睇中水晶宮20歲新星

曼城自從「不敗之男」洛迪卡斯簡迪受傷長抖之後，成績愈來愈差，根據英國傳媒爆料，「藍月亮」計劃明年1月轉會市場重開後，簽入1位防守中場暫代洛迪嘅位置，並已睇中水晶宮20歲新星禾頓。

據悉曼城球探經過觀察及分析冬季收購成功可能性之後，推薦禾頓，呢位英格蘭中場硬漢唔只攔截力強，並有出色技術及閱讀球賽能力，判斷力強，可以話係「年輕版」洛迪卡斯簡迪。

禾頓今年5月已經進身英格蘭大國腳，並有份入選今屆歐國盃大軍名單，雖然冇份上陣，但潛力毋庸置疑。由於水晶宮只係細球會，相信曼城只要出到5,000萬鎊(約5億港元)轉會費，應該可以將禾頓收歸旗下。