皇馬接觸利物浦　為草簽阿奴鋪路

利物浦26歲右閘阿歷山大阿諾特仲未續約，到明年1月就可以同國外球隊傾轉會，據報皇馬開始有動作，近日同利物浦接觸，安排「阿奴」草簽事宜。

阿諾特係利物浦青訓產品，2016年10月獲提拔上一隊至今，有關佢同球會續約談判持續咗好耐，一直未有結果，甚至前主帥高普離隊，現時由施洛領軍並取得美滿開局，阿諾特都未肯續約。

利物浦三大主力穆罕默德沙拿、華基爾雲迪積克同阿歷山大阿諾特同樣於明年6月約滿，前兩人都表態願意留隊，正在進行續約談判，利物浦主要考慮兩人年齡問題，分歧較少，反而阿諾特提出大幅加薪至周薪35萬鎊、做隊長及保證主力地位等，佢只係一個右閘，上述要求，利物浦都難以滿足。

根據規定，阿諾特可於明年1月與國外球隊草簽協議，利物浦不得阻止，除非利物浦答應阿諾特要求開出新合約，但睇嚟機會甚微。至於皇馬方面，據報英格蘭國腳祖迪比寧咸有份參與游說工作，加強阿諾特「上艦」決心。