士砵亭新波衫致敬C朗　搵埋囝囝做Model

葡超勁旅士砵亭日前推出今季第2作客波衫，新衫以黑色為主，但最特別係用金色油出一個巨型「7」字，用意係向傳奇球星C朗拿度致敬，士砵亭仲搵嚟C朗大仔做波衫Model，好有意思！

黑色新波衫上有金色條紋，除大大個「金7」圖案，衣領、衣袖都有金色，官方宣傳片亦強調「7」對士砵亭嘅意義，口號係：「有啲數字會留低傳奇，下一個7號可能就係你！」最特別係着住呢件新衫登場嘅Model，正正就係C朗囝囝。

C朗2002年喺士砵亭出道，為球隊上陣31場入過5球，之後就轉投曼聯展開「球王生涯」，至於小C朗依家14歲，正效力艾納斯嘅青年隊，不久將來有望子承父業。