球迷要求太高？麥巴比入波仍遭批評

皇家馬德里喺周日(1日)深夜西甲主場以2比0擊敗基達菲，球星基利安麥巴比射入1球，但仍然遭到輿論批評，指呢位法國國腳浪費太多機會，甚至冇勇氣主射12碼，睇來「麥總」嘅演出仍然未達球迷要求。

開賽30分鐘，皇馬後衞魯迪格博到12碼，由於首席劊子手雲尼斯奧斯祖利亞因傷缺陣，照計應該由基利安麥巴比操刀，但結果由祖迪比寧咸主射入網，令人質疑「麥總」冇信心主射。8分鐘後，祖迪比寧咸好識做，創造機會，傳畀麥巴比遠射地波入網。

祖迪比寧咸近3場西甲入3球及2次助攻，包括今仗1射1傳，但賽後麥巴比卻獲官方選為今場最佳球員，引起輿論不滿。

西班牙《馬卡報》指祖迪比寧咸、巴謙戴亞斯、丹尼施巴路斯今場表現比「麥總」出色，反而麥巴比浪費多次入波機會，包括單刀射空門，卻唔中目標，如非基達菲實力弱，恐怕皇馬未必可以全取3分。

皇馬贏波之後，追至僅落後榜首巴塞隆拿1分，並且踢少1場，有望重奪一哥位置。