艾摩廉暗寸坦哈格唔識用人　感謝雲佬「禮物」

曼聯上場英超大勝愛華頓4比0，其中3個入波同翼鋒阿密特迪亞路有關，賽後領隊魯賓艾摩廉特別點名稱讚呢位22歲科特迪瓦國腳，並感謝前看守領隊雲尼斯達萊提拔呢位新星，令佢現時發揮重要作用，似乎暗寸前主帥坦哈格唔識用人。

曼聯今場第2個入波，多得阿密特迪亞路逼甩對手班夫韋迪腳下球，造就般奴費南迪斯打反擊，由約舒亞舒克斯射入。紅魔鬼下半場2個波，都係由阿密特迪亞路助攻，佢仲有3次關鍵傳波，4次成功突破，4次成功搶截，14次對抗有11次勝出。

賽後魯賓艾摩廉話：「雲尼斯達萊執教期間，幫助咗迪亞路好多，依家輪到迪亞路幫助我，佢又有1場夢幻表現，攻守都非常出色，我現時享受緊雲佬嘅成果。」

阿密特迪亞路曾於季初有出色發揮，並當選曼聯8月最佳球員，但之後被坦哈格打入冷宮，一度傳出想離隊。雲尼斯達萊接手領軍後，迪亞路獲得重用，依家仲成為艾摩廉愛將，前途一片光明。