艾摩廉暗寸坦哈格唔识用人　感谢云佬“礼物”

曼联上场英超大胜爱华顿4比0，其中3个入波同翼锋阿密特迪亚路有关，赛后领队鲁宾艾摩廉特别点名称赞呢位22岁科特迪瓦国脚，并感谢前看守领队云尼斯达莱提拔呢位新星，令佢现时发挥重要作用，似乎暗寸前主帅坦哈格唔识用人。

曼联今场第2个入波，多得阿密特迪亚路逼甩对手班夫韦迪脚下球，造就般奴费南迪斯打反击，由约舒亚舒克斯射入。红魔鬼下半场2个波，都系由阿密特迪亚路助攻，佢仲有3次关键传波，4次成功突破，4次成功抢截，14次对抗有11次胜出。

赛后鲁宾艾摩廉话：“云尼斯达莱执教期间，帮助咗迪亚路好多，依家轮到迪亚路帮助我，佢又有1场梦幻表现，攻守都非常出色，我现时享受紧云佬嘅成果。”

阿密特迪亚路曾于季初有出色发挥，并当选曼联8月最佳球员，但之后被坦哈格打入冷宫，一度传出想离队。云尼斯达莱接手领军后，迪亚路获得重用，依家仲成为艾摩廉爱将，前途一片光明。