沙拿再發離隊宣言　夏利列納：佢肯定會走

利物浦慶祝擊敗曼城之際，交出1傳1射嘅埃及王牌前鋒沙拿再發出「離隊宣言」，表示今場應該係佢最後一次在晏菲路球場對曼城，名帥夏利列納指出沙拿仲未簽約，離隊已成定局，英超奪冠係最佳告別方式。

近期利物浦表現勢如破竹，2比0擊敗曼城後各項賽事7連勝，在英超歐聯雙榜首，但沙拿已經多次在賽後談論自己未續約，繼上次「雙紅會」話自己「可能最後一次對曼聯」，今場對曼城賽後又有類似說話。

佢話：「合約情況？老實講我仲諗緊，現時情況係，今場會係我為利物浦最後一次在晏菲路球場對曼城，所以我會好好享受佢。」

另有消息指，沙拿明年1月可以同國外球會傾轉會，盛傳法甲豪門巴黎聖日耳門有意接收，有法國傳媒分析指，上述傳聞只係沙拿團隊借PSG向利物浦施壓，沙拿根本冇諗過轉戰法甲。

77歲名帥夏利列納發表看法，認為沙拿已經可以確定明夏離隊：「續約問題拖咗咁耐，沙拿仲未簽約，無論佢向外講過乜，反而更加確定佢踢完今季肯定會走，如果贏得英超冠軍，會係一個最佳告別。」