雲爺爺都搞唔掂　羅馬4連敗陷降班危機

羅馬早前請73歲「球隊醫生」雲尼亞里出山執教，但都係搞唔掂，周二(3日)凌晨意甲主場0比2不敵阿特蘭大，遭遇聯賽4連敗，跌至第15位。羅馬今季兩度換帥之後，仍然冇起色，陷入降班危機。

羅馬因為成績差，季初解僱名宿主帥迪羅斯，但繼任人祖歷執教唔夠2個月就被炒，會方請來原本已退休嘅雲尼亞里回巢領軍，「雲爺爺」首場帶隊不敵拿玻里，雖然上周中歐霸盃逼和熱刺，但今場聯賽又打回原形。羅馬今仗創造唔少入球機會，都把握唔到，包括前鋒多夫碧無人看管下近門失機。

反觀，排第2位嘅阿特蘭大攻門效率高，兼有幸運之神眷顧，69分鐘中場迪魯恩遠射省中人改變方向入網。戰至比賽末段，尼高路辛尼奧路頂入角球，奠定2比0勝局，呢位25歲意大利國腳出道時喺羅馬打出名堂，一度被譽為「新托迪」，但上年2月同羅馬不歡而散，今仗倒戈入波大肆慶祝，完全冇面畀。

羅馬輸波之外，仲有中堅曉姆斯、中場白賴仁基斯坦迪受傷，令球隊雪上加霜，現時只領先尾3嘅科木2分，隨時跌入降班區。