艾摩廉唔領情？叫曼聯球迷唔好唱打氣歌

葡萄牙領隊魯賓艾摩廉執教曼聯後，迅速贏得球迷歡心，曼聯粉絲喺比賽中不斷唱艾摩廉嘅打氣歌曲，不過呢位少帥就「唔領情」，呼籲球迷停止唱佢嘅打氣歌，轉為幫場上嘅球員加油。

雖然只係帶隊3場，曼聯球迷已將KC and The Sunshine Band歌曲《Give It Up》改編，變成艾摩廉嘅專屬打氣歌，上場聯賽4比0大勝愛華頓一仗，歌聲就傳遍整個奧脫福球場。

不過艾摩廉表示：「我唔鍾意呢個打氣，唔鍾意。感覺有啲......又唔可以話尷尬，但我係個領隊，球迷應該為球員同球會加油。我明白同感激球迷對我嘅支持，但我想佢哋更加支持班球員，因為落場比賽嘅係佢哋。好榮幸同球迷建立呢種聯繫，我知道要用成績去繼續保持佢。」