曼聯好消息！天才中堅可復出鬥阿仙奴

曼聯好消息一單接一單，因傷今季一直未上陣嘅新加盟中堅蘭尼約羅已經準備就緒，可以復出踢周四(5日)凌晨英超作客阿仙奴。

19歲嘅蘭尼約羅今夏以5,200萬鎊(約5.1億港元)轉會費由里爾加盟曼聯，但8月踢季前熱身賽對阿仙奴一役受傷，導致蹠骨骨折，需要接受手術，並一直缺陣。呢位法國新星早前已復操，根據「轉會權威」記者羅曼諾(Fabrizio Romano)爆料，蘭尼約羅可以入選出戰阿仙奴嘅大軍名單。

賽前曼聯領隊魯賓艾摩廉大讚蘭尼約羅：「約羅係1位特別天才，好興奮可以同佢合作，佢速度非常快，屬於現代型後衞，適合高位壓逼戰術，佢一對一防守亦非常出色。」以艾摩廉言下之意，蘭尼約羅將會獲得重用。