耶馬新女友曝光　意大利網紅擁百萬粉絲

巴塞隆拿球星拉明耶馬，今個夏天為西班牙贏歐國盃後人氣爆燈，不過疑似「戴綠帽」後同女友分手。最近呢位17歲新星被爆已結新歡，女方係19歲嘅意大利網紅兼模特兒，而且社交網坐擁過100萬粉絲！

據西班牙《世界體育報》報道，耶馬最近同意大利網紅Anna Gegnoso拍拖，兩人被影到一齊Shopping，耶馬上場聯賽對拉斯彭馬斯復出，Anna亦專登飛去西班牙打氣。Anna喺IG有接近60萬追隨者，喺TikTok更有超過83萬粉絲。報道指兩人只係啱啱開始拍拖，耶馬好鍾意Anna，但目前選擇低調發展。

耶馬夏天為西班牙贏歐國盃嗰陣，前女友Alex Padilla都有落球場一齊慶祝，但冇耐後被爆出疑似「偷食」，有片段影到佢喺夜店坐喺一名男子大腿上面，之後就爆出分手消息。