摩連奴6年來首次5連勝　對上一次喺曼聯

土超費倫巴治在今輪賽事3比1擊敗加茲迪斯普，取得聯賽5連勝，原來亦係主教練摩連奴6年來首次聯賽連贏5場，對上一次係2018年年初，當時佢帶領曼聯取得聯賽5連勝。

「寸王」年初被羅馬炒魷後，今夏轉戰土超空降費倫巴治，目標係幫球隊爭奪聯賽冠軍，同埋喺歐洲賽爭取好成績，費倫巴治喺佢領軍下近期開始發力，取得聯賽5連勝，現時13戰得32分，落後榜首加拉塔沙雷3分，暫時排第2，保持爭標機會。

原來「摩dad」已經好耐冇試過聯賽5連勝，對上一次要數到2018年2月至4月，當時仍然係曼聯主帥，5場勝仗分別贏車路士、水晶宮、利物浦、史雲斯同曼城，該季最終曼聯排第2，但已被摩連奴形容為執教成績最好嘅其中一季。