勞基梳爾又傷　心痛發聲明：非常沮喪！

曼聯喺魯賓艾摩廉上任後成績好轉，傷兵亦都陸續康復，正當以為一切向好之際，傷愈復出冇耐嘅勞基梳爾又再受傷，據報要休戰幾個星期。呢位英格蘭國腳心痛發出聲明，表示對自己一傷再傷「非常沮喪」。

勞基梳爾喺聲明入面表示：「寫下呢番說話令我非常痛苦，我原本以為已經成功克服最近嘅困難，好不幸傷患又出現一啲問題。我經歷過好多起跌，但呢段日子肯定係最艱苦，我非常沮喪，亦好難接受呢個現實。我明白好多球迷會沮喪、憤怒同失望，但冇人會比我感受得更深。我保證會盡最大努力早日返嚟，幫助曼聯實現目標。」

29歲嘅勞基梳爾之前因小腿受傷抖咗4個月，復出後近3場賽事都有後備入替，但今次舊患復發，據報需要再休戰「幾個星期」。勞基梳爾喺上季尾已開始養傷，但夏天仍決意代表英格蘭出戰歐國盃決賽周，結果令傷患加重，因此受到唔少曼聯球迷批評。