紐亞生涯首食紅牌　拜仁德國盃被踢出局

周三(4日)凌晨德國盃16強，拜仁慕尼黑主場0比1不敵利華古遜，連續5季喺4強之前就「畢業」。38歲門將紐亞今場做罪人，佢喺早段就拎到個人足球生涯首面紅牌，令拜仁踢少個下輸波，佢賽後亦公開道歉。

關鍵一幕喺16分鐘出現，當時利華古遜後場長傳，紐亞棄關衝出禁區撞跌單刀嘅謝利美費林邦，被球證直接出示紅牌趕走。踢多個嘅利華古遜喺69分鐘，憑尼敦迪拿近門頂入全場唯一入球，將拜仁踢出局。

統計顯示，紐亞職業生涯踢過867場比賽，曾拎過23面黃牌，但今次係首次食紅牌，呢位傳奇門將賽後喺社交網公開道歉：「好艱難......我當時想去幫手(解圍)，好不幸來遲一步。紅牌之後，隊友打少個係極度困難，但佢哋仍然努力嘗試，實在好對唔住。」