安素棄妻女即結新歡　慶祝動作確認戀情？

車路士中場安素費南迪斯，上月宣布同為佢生咗對仔女嘅Valentina Cervantes分手，原因係「想經歷單身生活」。不過據阿根廷媒體爆料，安素「拋妻棄女」後閃電搭上歌星Nicki Nicole，最近佢嘅新入波慶祝動作，更被指為確認新戀情嘅證據！

阿根廷《民族報》報道，安素喺10月底搭上阿根廷歌星Nicki Nicole，兩人曾被目睹一齊去夜店，當時Nicki更承認「我同我約會緊嘅人去Party」，由緋聞出現到安素分手嘅時間點相當接近，好難唔令人懷疑安素係「貪新棄舊」。

雖然安素同Nicki都冇承認拍拖，不過呢位車路士球星最近連續2場入波後，都做出「打電話」嘅慶祝動作，而Nicki上年就曾經推出爆紅歌曲《Llamame》(Call Me)，網民相信安素嘅動作就係和應Nicki嘅首本名曲。