韋碧克回歸曼聯？紅魔名宿力撐夢幻轉會

白禮頓今季喺英超名列前茅，老將前鋒韋碧克嘅出色表現係主要原因，近日有傳呢位34歲前鋒，成為曼聯1月份收購目標之一，連「紅魔」名將沙柏都大力支持。不過韋碧克就表明只會專注白禮頓比賽，轉會嘅事「控制唔到」。

韋碧克今季13場聯賽全部正選上陣，交出6個入波同2次助攻，傳聞曼聯考慮1月轉會窗搵佢回巢，90年代紅魔翼鋒沙柏表示：「韋碧克對曼聯會好有用，佢滿場飛製造機會，有可以入到波，狀態回復巔峰，好適合英超比賽。」沙柏指曼聯喺明年夏天重金簽前鋒前，韋碧克係最好嘅「頂更」人選。

韋碧克喺曼聯青訓出身，喺一隊踢過6年後，2014年轉投阿仙奴，4年前加盟白禮頓愈踢愈好，佢同球會仲有1年半合約。對於重返曼聯傳聞，韋碧克就話：「一切都係猜測，作為一個曼徹斯特細路，我同曼聯係有特別感情，其他嘅事我控制唔到，我依家只係專注為白禮頓比賽。」