古古列拿被扯頭髮造紅牌　車仔大炒修咸頓

周四(5日)凌晨英超，車路士作客5比1大炒修咸頓，依家只係落後「1哥」利物浦7分，再次展示爭標實力。「爆炸頭」古古列拿今場被對手扯頭髮製造紅牌，成為另類贏波功臣。

車路士今場作出大幅輪換，不過戰力絲毫未減，7分鐘就由阿素迪沙斯接應角球頂入，雖然4分鐘後就被修咸頓追平，不過尼干古同馬度基接連入波，為車路士建立3比1嘅優勢。

修咸頓本來表現唔差，但39分鐘積克史堤芬斯「衰多手」扯古古列拿長髮，被球證出示紅牌趕出場。踢多個嘅車仔下半場再由高爾彭馬同查頓辛祖入波，湊成5比1大勝。

車路士領隊馬利斯卡賽後表示：「今場感覺好正，球迷見到車路士已經返嚟，呢一點係最重要，見到球迷開心係我哋嘅目標，每日努力練習就係為咗令球迷開心。」