【有片】基艾沙復出即入波　紅軍添爭冠武器

利物浦喺英超穩坐「1哥」位置，雖然啱啱被紐卡素逼和失分，不過亦有好消息傳出，夏天加盟嘅意大利國腳費達歷高基艾沙，養傷兩個幾月後為利物浦U21復出即刻入波，為「紅軍」爭冠再添殺器！

基艾沙夏季由祖雲達斯加盟後，只係上陣過3場就受傷，今場「英超國際盃」代表利物浦U21對洛斯查蘭特U21，係佢自9月底英聯盃對韋斯咸後首次上陣。基艾沙只係11分鐘就入波，踢咗61分鐘先被換走，最終利物浦U21以3比4落敗。

基艾沙入球片段：https://x.com/i/status/1864388380856910205　

27歲嘅基艾沙近年飽受傷患困擾，不過佢同利物浦簽約4年，仍然有大把時間去建立自己嘅地位，而且基艾沙可以勝任前場各個位置，只要可以保持健康，會係領隊施洛手上一個好使好用嘅球員。