沙拿成功續約利物浦？埃及名將搶先祝賀！

利物浦同穆罕默德沙拿續約拉鋸多時，最近沙拿多次「出口術」向會方施壓，球場上亦不斷用入波證明自己嘅價值，據報利物浦終於順應民意，接納沙拿開出嘅所有條件，埃及名將兼沙拿密友法魯克，喺社交網祝賀沙拿成功續約，搶先報喜！

沙拿同利物浦合約明年到期，佢已經32歲兼周薪35萬鎊，令「紅軍」對續長約有所憂慮，不過呢位埃及前鋒今季狀態巔峰，14輪聯賽入13球排英超射手榜第1位，係利物浦排英超榜首嘅最大原因，而沙拿近期多次暗示「可能被迫離隊」，就令利物浦飽受壓力。

最近終於有好消息傳出，估唔到爆料者係90年代埃及名將法魯克，佢依家為beIN Sports做足球分析，同沙拿亦有密切聯繫，佢喺社交網貼出同沙拿嘅舊合照，留言話：「恭喜你成功續約！條件同年期都如你所願，埃及皇帝自己話晒事！」