洛杉磯銀河稱霸美職　列奧斯終圓冠軍夢

周日(8日)朝早美職季後賽總決賽，洛杉磯銀河以2比1擊敗紐約紅牛，紀錄性第6度贏得美職總冠軍，德國球星馬高列奧斯加盟半季就捧盃，終於得到職業生涯首個聯賽冠軍。

洛杉磯銀河今場先聲奪人，9分鐘由約瑟賓素開紀錄，4分鐘後再由祖維積增添紀錄，早早就建立兩球優勢；紅牛28分鐘靠尼亞列斯追番1球，但洛杉磯銀河之後堅守城池，保住2比1勝果封王。

銀河自2014年由羅比堅尼領軍奪冠後，相隔10年再度執王，第6度捧盃亦係美職史上最成功球隊，捧盃第2多嘅華盛頓聯頓只有4次封王紀錄。

今年8月加盟銀河嘅德國球星馬高列奧斯，效力多蒙特12季只拎過2次德盃冠軍，同聯賽冠軍一直無緣，今次佢就以35歲之齡首嘗聯賽冠軍滋味。