古古列拿两次跣脚让两球　拎波砵去堆田出气

车路士喺英超戏剧性4比3反胜热刺，古古列拿喺开波早段两次跣脚，令热刺一度领先2比0，呢位西班牙国脚要即场更换波砵，好在最终成功逆转赢波。古古列拿赛后自贴将波砵丢落垃圾桶嘅相片，帮自己出番啖气！

英国近期天气麻麻，今场比赛一样场湿路滑，4分钟古古列拿后场拎波跣低，被对手抢走后传中射入；7分钟后古古列拿再喺后场解围跣脚，被柏度朴路抢到交畀古路施夫斯基射入。嬲爆嘅古古列拿即刻去后备席更换新砵，“换鞋大法”立竿见影，17分钟佢就助攻查顿辛祖入波，掀起反胜序幕。

赛后古古列拿喺社交网道歉“对唔住蓝军”，并且贴上一张波砵丢喺垃圾桶内嘅相片，惩罚失波嘅“罪魁祸首”。领队马利斯卡赛后亦借跣脚事件开玩笑：“讲真，车路士仲未有能力争标，同顶尖球队仲有距离，阿仙奴、曼城同利物浦应该唔会好似古古列拿咁跣低。”