李城神奇逼和白禮頓　雲佬英超領軍未輸過！

上月被曼聯炒魷嘅雲尼斯達萊，執教李斯特城第2場波續有好表現，周日(8日)英超主場迎戰白禮頓，喺85分鐘仲落後兩球嘅絕境下，尾後神奇連入2球追和2比2，令「雲佬」執教英超球隊6場仍保持不敗。

面對今季成績突出嘅白禮頓，李城一如所料非常被動，客隊37分鐘由蘭普堤先開紀錄，79分鐘再憑恩古巴明泰快速反擊入波拉開比數。以為李城大勢已去，86分鐘占美華迪近門破蛋，呢位37歲老將補時1分鐘再助攻卜比列特追平，戲劇性執番1分。

「雲佬」執教李斯特城兩仗1勝1和，連同之後以看守領隊帶領曼聯3勝1和，佢喺英超領軍生涯6仗仍未輸過。事實上，連同佢之前執教荷甲嘅燕豪芬，「雲佬」對上一次以主帥身份喺聯賽輸波，已經係2023年1月，差唔多2年聯賽不敗！