明年1月跟操　沙夏：曼聯重簽普巴利多於弊

同祖雲達斯解約後搵唔到班落嘅31歲前法國國腳保羅普巴，網傳將於明年1月重返曼聯跟操，仲會獲得現任主帥魯賓艾摩廉指導，前紅魔名將沙夏指出，曼聯重簽普巴利多於弊，值得考慮。

因使用禁藥被罰停賽4年，早前上訴獲減刑嘅普巴，11月30日同祖雲達斯協議解約回復自由身，但停賽令到明年3月1日先解除，所以依家就算有班落都唔落得場，而且佢成年冇踢過，要搵地方操起狀態，沙夏表示，傳聞普巴明年1月將會重返曼聯跟操，主帥艾摩廉會親自指導。

沙夏爆料後引起熱烈討論，多間傳媒紛紛轉載，沙夏進一步指出，其實曼聯重簽普巴利多於弊，佢話：「對於普巴嚟講係一個好機會，而且佢係一位非常特別嘅球員，現時曼聯正欠缺中場力量，普巴如能操起狀態，正好填補曼聯呢方面缺口。」

「簽入自由身嘅普巴仍然好有吸引力，而且薪酬方面相信普巴都唔會要求太高，畢意佢有一段長時間冇踢過。」

由跟操變臨時工，再由臨時工變長工，曼聯唔係未試過，最新例子有莊尼伊雲斯，所以曼聯用呢種方式簽番普巴，唔係冇可能。