明年1月跟操　沙夏：曼联重签普巴利多于弊

同祖云达斯解约后搵唔到班落嘅31岁前法国国脚保罗普巴，网传将于明年1月重返曼联跟操，仲会获得现任主帅鲁宾艾摩廉指导，前红魔名将沙夏指出，曼联重签普巴利多于弊，值得考虑。

因使用禁药被罚停赛4年，早前上诉获减刑嘅普巴，11月30日同祖云达斯协议解约回复自由身，但停赛令到明年3月1日先解除，所以依家就算有班落都唔落得场，而且佢成年冇踢过，要搵地方操起状态，沙夏表示，传闻普巴明年1月将会重返曼联跟操，主帅艾摩廉会亲自指导。

沙夏爆料后引起热烈讨论，多间传媒纷纷转载，沙夏进一步指出，其实曼联重签普巴利多于弊，佢话：“对于普巴嚟讲系一个好机会，而且佢系一位非常特别嘅球员，现时曼联正欠缺中场力量，普巴如能操起状态，正好填补曼联呢方面缺口。”

“签入自由身嘅普巴仍然好有吸引力，而且薪酬方面相信普巴都唔会要求太高，毕意佢有一段长时间冇踢过。”

由跟操变临时工，再由临时工变长工，曼联唔系未试过，最新例子有庄尼伊云斯，所以曼联用呢种方式签番普巴，唔系冇可能。