【官宣】严重违纪！英超“丑闻球证”被炒鱿

喺英超执法6年嘅著名球证大卫古特，早前爆出“侮辱高普”同“疑似吸毒”影片后被停职，英国职业裁判员公司(PGMOL)周二(9日)正式宣布，大卫古特因严重违反纪律，已经被解雇，呢位42岁球证有权提出上诉。

PGMOL发出声明表示：“喺对大卫古特进行调查后，我哋决定即时同佢解除合约，佢嘅行为严重违反合约守则，PGMOL仍然会保障大卫古特嘅权益，佢可以就今次解除合约结果提出上诉。”大卫古特最后1场英超执法，就系上月中利物浦2比0赢阿士东维拉。

上月网上流出2段影片，一段系大卫古特喺4年前私下侮辱当时利物浦领队系“德国X佬”、“利物浦系狗屎”，另一段就见到佢今夏欧国杯执法期间，喺酒店内吸服疑似系毒品嘅白色粉末。近日再传出佢5年前曾喺英超赛前“预告”畀黄牌列斯联球员，惹嚟造波疑云。