前曼聯後衞掛靴　奪兩冠完美告別

前曼聯後衞拉菲爾達施華正式掛靴，結束16年職業球員生涯，呢位巴西名將今季協助保地花高奪得南美自由盃及巴甲冠軍，可以話係完美告別。

現年34歲嘅拉菲爾達施華出身於富明尼斯青年軍，2008年夏天同孿生兄弟法比奧達施華，一齊由富明尼斯加盟曼聯，司職右閘嘅拉菲爾達施華為紅魔鬼累積上陣170場入5球，捧過3次英超、1次英聯盃及1次世冠盃冠軍。

拉菲爾達施華2015年轉投法甲球隊里昂，亦曾短暫效力土耳其球隊巴沙克舒希，2021年重返巴西，加盟當時仲係巴乙球隊嘅保地花高，估唔到拉菲爾達施華效力3年，球隊現已成為南美自由盃及巴甲「雙冠王」。

不過，拉菲爾達施華因為經常受傷缺陣，無法應付高水平賽事，所以決定掛靴。