33歲丹尼路雷斯翻生　倒戈曼城誓踢爭氣波

祖雲達斯今季由少帥莫達接手執教後，積極推行年輕化，導致33歲隊長丹尼路雷斯一度坐冷板，但呢位巴西後衞真金不怕紅爐火，近期重奪正選，甚至有望護得續約。

莫達有心栽培2位「00後」新星安達亞甘比亞素、尼高路沙禾拿擔任左右二閘，身為嘅隊長丹尼路雷斯上陣時間減少，令佢意興闌珊，曾要求移除合約之中自動續約1年條款，希望明夏自由身離隊。

不過，近期情況有變，尼高路沙禾拿有傷及狀態欠佳，丹尼路雷斯重獲正選右閘，並交足功課，上場意甲對博洛尼亞，貢獻1次助攻，可以話係有心有力，表現大受好評，意大利傳媒認為丹尼路雷斯架功十足，會方應該同佢續約。

事實上，曾效力波圖、皇馬、曼城嘅丹尼路雷斯大賽經驗豐富，正係現時呢支年輕祖記最需要嘅元素，佢可以勝任左右二閘及中堅，技術非常全面。祖雲達斯將於周四(12日)凌晨歐聯主場對曼城，丹尼路雷斯倒戈「藍月亮」，將扮演重要角色，因為佢熟悉對方主帥哥迪奧拿戰術思維，可以為教練莫達及隊友提供重要情報。