皇马唔等阿奴　冬窗签达洛治

皇家马德里搵右闸有新进展，据报佢哋唔等阿历山大阿诺特出年夏天免费加盟，决定明年1月冬季转会窗出手，向曼联签入葡萄牙国脚达洛治，曼联转会费标价4,500万镑(约4.46亿港元)都照畀，以迎接下半季赛事。

皇马防线一直唔够人，除咗几位中坚轮流受伤，右闸更只得32岁老将丹尼尔卡华积，而且近期受伤要用卢卡斯华斯基斯顶住，搵个年轻当打右闸先系长远之计，最初佢哋属意阿历山大阿诺特，但要等明年夏天约满，而且利物浦今季成绩出乎意料咁好，“阿奴”极可能续约，所以皇马决定转移目标。

皇马右闸PlanB方案就系达洛治，据报曼联对于出售达洛治持开放态度，只要到价就会出售，标价4,500万镑，收回资金仲可以畀新帅鲁宾艾摩廉增兵；至于达洛治本人则渴望“上舰”，在更大舞台争取表现。

报道指，皇马就达洛治交易谈判进入尾声，下月转会市场重开即可进行交易。25岁嘅达洛治2018年夏天由波图加盟曼联，至今6个半球季，其中2020至21年球季外借到AC米兰，今季曼联签入马沙拉奥，达洛治要客串左闸，艾摩廉上任后再改踢左翼，而且人工偏低，周薪只得8.5万镑，想走都好正常。