孙兴民抢手　同巴塞土超扯上关系

孙兴民上场联赛对车路士单刀失机累热刺输波后，有关“孙仔”明夏约满离队传闻四起，继上周传佢去曼联之后，近日再传土超加拉塔沙雷同西甲豪门巴塞隆拿都同佢扯上关，认真热闹。

32岁嘅孙兴民明夏同热刺约满，下个月就可以同海外球队草签协议，热刺不得阻止，而现时热刺嘅态度系只愿意同孙仔启动延长合约1年条款，对于续约就冷处理，加上上场单刀射失，令佢离队传闻再起。

西班牙传媒报道，孙兴民愿意加盟巴塞隆拿，双方将进行接触，巴塞睇中孙兴民嘅进攻能力，同埋对开发亚洲市场都有帮助，最重要系免费，虽然同时又传出加拉塔沙雷对佢有兴趣，用佢填补借将域陀奥森汉离队后嘅中锋空缺，但一般相信孙仔属意巴塞。