查頓辛祖翻生因愛情滋潤　傳搭上美國名模

英格蘭翼鋒查頓辛祖近期喺車路士翻生，原來球場外一樣風生水起，傳聞佢同美國著名模特兒Karrueche Tran秘密撻着，真係人逢喜事精神爽！

查頓辛祖近期愈戰愈勇，連續兩場聯賽都入波，近日有傳媒爆料，佢同36歲名模Karrueche撻着，消息指早喺上半年，呢位有越南血統嘅靚女已經飛去英國同查頓辛祖密會，8月份亦Like咗查頓辛祖確定轉會車路士嘅IG貼文；早前女方去東京，更不避嫌着住查頓辛祖件車路士作客波衫，令戀情更加似層層。

Karrueche過往最轟動戀情係同美國歌星Chris Brown，佢同足球員亦有淵源，9年前就曾經被傳同成名冇耐嘅荷蘭翼鋒迪比拍拖，亦曾經同NFL球星Victor Cruz拍拖4年，對運動員情有獨鍾。