查顿辛祖翻生因爱情滋润　传搭上美国名模

英格兰翼锋查顿辛祖近期喺车路士翻生，原来球场外一样风生水起，传闻佢同美国著名模特儿Karrueche Tran秘密挞着，真系人逢喜事精神爽！

查顿辛祖近期愈战愈勇，连续两场联赛都入波，近日有传媒爆料，佢同36岁名模Karrueche挞着，消息指早喺上半年，呢位有越南血统嘅靓女已经飞去英国同查顿辛祖密会，8月份亦Like咗查顿辛祖确定转会车路士嘅IG贴文；早前女方去东京，更不避嫌着住查顿辛祖件车路士作客波衫，令恋情更加似层层。

Karrueche过往最轰动恋情系同美国歌星Chris Brown，佢同足球员亦有渊源，9年前就曾经被传同成名冇耐嘅荷兰翼锋迪比拍拖，亦曾经同NFL球星Victor Cruz拍拖4年，对运动员情有独锺。