皮里茲囝囝策劃　皇馬想賣雲尼斯奧斯？

皇家馬德里今季簽入基利安麥巴比後，成績未見提升，巴西前鋒雲尼斯奧斯祖利亞喺「金球獎風波」後，亦成為眾矢之的。據西班牙傳媒報道，皇馬隊內開始出現賣走雲尼斯奧斯嘅聲音，當中最大推手竟然係會長皮里茲個仔！

西班牙《每日體育報》報道，皮里茲雖然一直支持雲尼斯奧斯，不過喺隊內權力日漸加重嘅囝囝Chivo，就認為賣走雲尼斯奧斯對皇馬發展最有利。一來可為皇馬帶嚟巨額轉會費，有助新球場計劃同解決財政問題，二來可以畀麥巴比踢番擅長嘅左路，改善攻守唔平衡嘅問題。

一直有傳聞指，沙特阿拉伯球會願意動用史上最高人工、價值1億歐元嘅5年合約利誘雲尼斯奧斯加盟，轉會費可高達4億歐元，呢位巴西前鋒嘅經理人甚至喺倫敦同沙特球會代表見過面，但最後都決定留喺皇馬。