零下13度「寒戰」　車路士輕鬆贏波出線

周五(13日)凌晨歐協聯，車路士遠赴哈薩克，喺攝氏零下13度嚴寒天氣之下比賽，仍然輕鬆以3比1作客擊敗艾斯坦拿，5戰全勝，提早1輪成為首支直接出線16強嘅球隊。

車路士領隊馬利斯卡繼續以副選出戰歐協聯，仍然佔盡優勢，開賽14分鐘就由18歲西班牙小將馬克基奧個人突破射入打開紀錄。僅過4分鐘，柏度尼圖右路傳中，導致艾斯坦拿中堅馬路治堅擺烏龍，加上連拿度維加頂入角球，車路士39分鐘已領先3球。

雖然艾斯坦拿臨完上半場返番1球，但餘下時間都未能收復失地，車路士下半場亦留有一手，維持贏3比1，踢5場全勝，領先第9位維也納迅速5分，由於只剩下1輪賽事，車路士肯定取得前8位直接出線16強。