阿迪達變冧女高手　靚女主播自認「達迷」

下星期就係阿迪達執教阿仙奴5周年，「兵工廠」重建計劃亦見到明顯成效，阿迪達嘅個人魅力係其中一個重要元素，原來呢位西班牙型佬仲係冧女高手，日前向英國靚女體育主播Laura Woods送神秘禮物，就氹到對方鬼咁開心。

Laura Woods係阿仙奴球迷，日前亦有採訪阿仙奴主場對摩納哥嘅歐聯賽事，7月份宣布大肚嘅Laura Woods喺社交網自爆，賽後阿迪達專登預備咗份禮物畀佢，阿仙奴嘅禮物袋入面有兩套球會出品嘅BB衫同公仔，Laura Woods表示「太正啦！多謝！」並形容「非常可愛」同「我的愛隊」，似乎對阿迪達嘅禮物非常滿意。

37歲嘅Laura Woods曾自爆「達迷」，早前就曾自爆喺活動同阿迪達一齊食飯嘅經歷：「我哋成餐飯冇講阿仙奴，而係傾拳擊同飛鏢，佢好平易近人，大家喺記者會見到領隊都係公式化同官腔，但當晚我哋好輕鬆，阿迪達講嘢好有啟發性同影響力，我明白點解球員咁Buy佢。」