阿迪达变冧女高手　靓女主播自认“达迷”

下星期就系阿迪达执教阿仙奴5周年，“兵工厂”重建计划亦见到明显成效，阿迪达嘅个人魅力系其中一个重要元素，原来呢位西班牙型佬仲系冧女高手，日前向英国靓女体育主播Laura Woods送神秘礼物，就凼到对方鬼咁开心。

Laura Woods系阿仙奴球迷，日前亦有采访阿仙奴主场对摩纳哥嘅欧联赛事，7月份宣布大肚嘅Laura Woods喺社交网自爆，赛后阿迪达专登预备咗份礼物畀佢，阿仙奴嘅礼物袋入面有两套球会出品嘅BB衫同公仔，Laura Woods表示“太正啦！多谢！”并形容“非常可爱”同“我的爱队”，似乎对阿迪达嘅礼物非常满意。

37岁嘅Laura Woods曾自爆“达迷”，早前就曾自爆喺活动同阿迪达一齐食饭嘅经历：“我哋成餐饭冇讲阿仙奴，而系倾拳击同飞镖，佢好平易近人，大家喺记者会见到领队都系公式化同官腔，但当晚我哋好轻松，阿迪达讲嘢好有启发性同影响力，我明白点解球员咁Buy佢。”