高爾彭馬慶祝動作成註冊商標　食大茶飯

高爾彭馬今季愈踢愈好，已經成為車路士進攻靈魂，而佢嘅慶祝動作—雙手抱雙臂，食字Cold Palmer或Cool Palmer「凍彭馬」或「型彭馬」，成為佢標誌性動作，據報佢打算將呢個動作變成註冊商標，實行食大茶飯。

22歲嘅高爾彭馬上季以4,250萬鎊由曼城轉投車路士，加盟首個球季雖然車路士成績一般，但佢上陣45場攻入25球，表現出色，今季車路士成績重回正軌，高爾彭馬至今交出11球6助攻，對方往往要搵2至3人嘜佢，甚至要用超技術踢傷佢，令身價估計更上升至9,000萬鎊，而且人氣愈嚟愈高，身價破億在望。

呢位進攻中場有個標誌性入球慶祝動作，就係雙手抱臂，係感覺寒冷嘅身體語言，據報靈感來自佢一位青年軍隊友，高爾彭馬打算將呢個動作註冊為商標，呢個商標日後有好多用途，包括酒類、飲料、食品、服裝、玩具、剃鬚產品、化妝品及汽車，為佢帶來場外收入。