高尔彭马庆祝动作成注册商标　食大茶饭

高尔彭马今季愈踢愈好，已经成为车路士进攻灵魂，而佢嘅庆祝动作—双手抱双臂，食字Cold Palmer或Cool Palmer“冻彭马”或“型彭马”，成为佢标志性动作，据报佢打算将呢个动作变成注册商标，实行食大茶饭。

22岁嘅高尔彭马上季以4,250万镑由曼城转投车路士，加盟首个球季虽然车路士成绩一般，但佢上阵45场攻入25球，表现出色，今季车路士成绩重回正轨，高尔彭马至今交出11球6助攻，对方往往要搵2至3人唛佢，甚至要用超技术踢伤佢，令身价估计更上升至9,000万镑，而且人气愈嚟愈高，身价破亿在望。

呢位进攻中场有个标志性入球庆祝动作，就系双手抱臂，系感觉寒冷嘅身体语言，据报灵感来自佢一位青年军队友，高尔彭马打算将呢个动作注册为商标，呢个商标日后有好多用途，包括酒类、饮料、食品、服装、玩具、剃须产品、化妆品及汽车，为佢带来场外收入。