利物浦“炸弹人”又自爆　10人应战逼和富咸

英超“1哥”利物浦，周六(14日)主场只能2比2逼和富咸，连续2场联赛失分，“红军”今场最大罪人系左闸安德鲁罗拔臣，佢早段先将个波闩入自己龙门，转头仲食红牌累球队超过70分钟踢少个，加埋近期连环“送12码”嘅差劲表现，顿成利物浦争逐英超冠军最大负累。

利物浦今场开局劲唔顺，11分钟富咸嘅安达斯彭利拿窄位窝利抽射，省中罗拔臣后改变方向入网。呢个失波罗拔臣只系黑仔，但17分钟一次严重犯错就责无旁贷，佢喺后场控波甩脚，被哈利威尔逊摄赢后，情急下踢跌对手，难逃被出示红牌赶走命运。

“红军”踢少个未放弃，换边后2分钟由加普插水式头槌追平，但有人数优势嘅富咸，76分钟由洛迪高梅尼斯接应传中，门前用后脚妙射再次领先。完场前4分钟，利物浦凭伤愈嘅迪亚高祖达后备上阵救驾，佢喺禁区顶扭过对手冷静射入，为利物浦抢番1分。

30岁嘅罗拔臣近期成为“炸弹人”，过去1个月内先后2次输12码(对修咸顿、皇家马德里)_，今场仲食埋红牌，成为利物浦防线最大漏洞，不过领队施洛赛后为罗拔臣辩护：“罗拔臣早段被踢伤膝头，我希望佢可以顶住，呢个亦系佢嘅性格，但之后发现佢真系唔妥，好不幸红牌就出现，佢平时应该更快(解围)，冇嘢可以怪佢。”