連續3場生波0入球　阿仙奴被愛華頓悶和

阿仙奴喺周六(14日)英超主場出擊，全場有77%控球率下慘被愛華頓悶和0比0，連續3場聯賽「生波」0入球，導致近兩仗都和波失分，錯失追近榜首利物浦嘅機會。阿仙奴領隊阿迪達賽後唔認進攻創造力有問題，但承認把握力需要改善。

阿仙奴今仗圍攻「泊大巴」嘅愛華頓，全場有13次攻門，最佳機會出現喺29分鐘，馬田奧迪加特10碼狂抽被比克福特救出，加比爾馬天尼利同布卡約沙卡嘅射門，亦都逃唔過英格蘭門神比克福特五指關，而且阿仙奴死球戰術冇收穫，最終0比0完場。

阿仙奴近3場英超，3個入波全部嚟自角球攻勢，不過阿迪達就否認「生波」唔識入波：「我哋3日前(歐聯)先入咗3球生波，咁點計？如果我哋繼續製造到今場嘅機會，呢個情況唔會持續。當然球員最後一腳嘅把握力係需要改善，呢點無庸置疑。」