连续3场生波0入球　阿仙奴被爱华顿闷和

阿仙奴喺周六(14日)英超主场出击，全场有77%控球率下惨被爱华顿闷和0比0，连续3场联赛“生波”0入球，导致近两仗都和波失分，错失追近榜首利物浦嘅机会。阿仙奴领队阿迪达赛后唔认进攻创造力有问题，但承认把握力需要改善。

阿仙奴今仗围攻“泊大巴”嘅爱华顿，全场有13次攻门，最佳机会出现喺29分钟，马田奥迪加特10码狂抽被比克福特救出，加比尔马天尼利同布卡约沙卡嘅射门，亦都逃唔过英格兰门神比克福特五指关，而且阿仙奴死球战术冇收获，最终0比0完场。

阿仙奴近3场英超，3个入波全部嚟自角球攻势，不过阿迪达就否认“生波”唔识入波：“我哋3日前(欧联)先入咗3球生波，咁点计？如果我哋继续制造到今场嘅机会，呢个情况唔会持续。当然球员最后一脚嘅把握力系需要改善，呢点无庸置疑。”