祖雲達斯變「和波專家」　21世紀同期最少勝仗

意甲老牌球隊祖雲達斯今季變成「和波專家」，周日(15日)凌晨主場出擊，驚險以2比2逼和榜尾球隊威尼斯，連1.27倍主勝都開唔出。雖然祖記開季後踢16場聯賽仍保持不敗，但當中有10場打和，只贏得6場，成為球隊自1998/99年球季之後，單季首16輪最少聯賽勝仗紀錄。

祖雲達斯上場歐聯以2比0擊敗曼城，但返回聯賽對護級份子威尼斯，卻老貓燒鬚，雖然開波19分鐘由中堅費達歷高加迪近門射入先開紀錄，但換邊後陷入劣勢，被威尼斯中場艾達斯臣頂入扳平，踢到83分鐘，中堅艾迪斯頭槌破網，為威尼斯戲劇性反超前2比1。

祖雲達斯即將輸波之際，戰至補時獲得12碼，由杜辛華荷域主射入網逼和2比2，連續4場意甲打和，今季聯賽累積10場和波，屬於歐洲5大聯賽最多場打和嘅球隊，已落後榜首阿特蘭大9分。賽後祖記教練莫達表示，從未講過今季要爭標，似乎已提早投降。